Profense ya Limpopo e itemogetše go phulega ga bolwetši bja Tlhako le Molomo
Bolwetši ba Tlhako le Molomo ke eng?
Bolwetši bja Tlhako le Molomo ke bolwetši bja go fetela bjo bo hlolago dintho goba dikgobalo ka gare ga molomo le ditlhakong tša leruo (kudu dikgomo, dikolobe, dipudi le dinku).
Naa o ka bo bona bjang?
Bolwetši bo ka bonala ka ge seruiwa se eba le mare a mantšintši le go palelwa ke go sepela goba go hlotša.
Naa bo ka ama Batho?
Bolwetši bja Tlhako le Molomo ga bo ame goba go hlola malwetši bathong. Nama ya diruiwa tšeo di fetetšwego ke bolwetši bjo e ka jewa.
Ke eng seo o swanetšego go se dira?
Ge dika tšeo di boletšwego di bonala, o kgopelwa go tsebiša badiredi ba Kgoro ya tša Temo le Tlhabollo ya Metsemagae le go thibela mesepelo ya leruo.
Go iletšwa ga mesepelo ya leruo
Mesepelo ka ntle ga mafelo ao a amilwego ke go phulega ga bolwetši e ileditšwe.
Taolo le thibelo
Netefatša gore dikgomo tša gago di hlabetšwe mo mafelong ao go entiwa ga leruo go nyakegago. Bao ba hwetšwago ba sepetša dikgomo go tloga lefelong le lengwe go di iša go le lengwe ntle le molao goba ka ntle le phemiti ya go šuthiša diphoofolo ba tla otlwa ka semola. Ditšhaba di kgopelwa go bega bao ba tshelago melawana ya mesepelo ya diphoofolo goba bao ba sa latelego magato a semolao a tshepedišo.
DIKA TŠA BOLWETŠI BJA TLHAKO LE MOLOMO
- Maphone goba dišo ka ganong (marinining, melomong le lelemeng). Dišo tše di palediša phoofolo go ja gomme phoofolo e ediša ditete/mare a mantšintš
- Maphone goba dišo mokgahlong ga ditlhako le fao ditlhako di kopanago le mokgopa. Maphone goba dišo tše di ka direla gore phoofolo e palelwe ke go sepela goba e sepele ka go hlotš Mabakeng a mangwe phoofolo e lahlegelwa ke dinala goba ditlhako.
- Dikgomo di ka tšwa dišo dihlokong tša matsweleng a tšona gomme se se ka dira gore maswi a se sa kgona go tšwa gabonolo.
Bjalo ka Kgoro yeo e nago le ditsebi, re kgonne go laola bolwetši bjo gomme re tšwela pele ka thibelo ya bolwetši ka moento le go laola mosepelo wa diphoofolo.
Ditebogo
Re rata go leboga balemi ka moka le ditšhaba bao ba šomišanago le go thekga ntwa kgahlanong le phatlalalo ya bolwetši bja Tlhako le Molomo.
Go hwetša tshedimošo ka botlalo, o kgopelwa go etela diofisi tša rena kgauswi le lena goba o leletše Bašomedi ba Selete ba Bongaka bja Diphoofolo mogala;
Selete sa Vhembe – 066 079 4597 Ngk Tambudzani Rhangani
Selete sa Mopani – 072 553 0122 Ngk KB Mohlabe / 066 079 4201 Ngk Vonani Mashau
Selete sa Sekhukhune – 082 681 7259 Ngk Charmaine Nemulodi
Selete sa Capricorn – 060 978 2317 Ngk Nthabiseng Mashigo
Selete sa Waterberg – 082 936 2121 Ngk Kgabo Letsoalo
