MVETAMVETO YA VHULWADZE HA KHWANḒA NA MULOMO
Vundu ḽa Limpopo ḽo tshoṱelwa nga u wa ha vhulwadze ha Khwanḓa na Mulomo (FMD)).
FMD ndi mini?
Vhulwadze ha Khwanḓa na Mulomo ndi vhulwadze vhu vhangwaho nga vairasi ine ya vhanga zwilonda kana u swotowa kha mulomo na kha khwanḓa dza zwifuwo (nga maanḓa Kholomo, Nguluvhe, Mbudzi na Nngu)
Vha nga vhu vhona hani?
Vhulwadze vhu nga vhonala nga nthe dzo kalulaho na nga u kundelwa u tshimbila zwavhuḓi (U ṱudza).
Vhulwadze uvhu vhu nga kwama Vhathu?
Vhulwadze ha FMD a vhu kwami vhathu kana u vhanga vhulwadze kha vhathu. Ṋama ya tshipuka tshi re na vhulwadze ha FMD i nga kha ḓi ḽiwa
Vha fanela u ita mini?
Arali tsumbadwadze dzo bulwaho dzi tshi khou vhonala, kha vha ṱavhanye vha ḓivhadze vhaofisiri vha Muhasho wa Vhulimi na Mveledziso ya Mahayani nahone zwifuwo zwi songo tsha pfuluswa.
U thivhela mupfuluwo
Mupfuluwo wa u bva fhethu he vhulwadze ha ṱaha hone wo iledzwa/thivhelwa.
Ndangulo na u thivhela
Kha vha vhe na vhuṱanzi ha u ri kholomo dzavho dzo ṱhavheliwa fhethu hune ha ṱhavhelwa hone. Avho vhane vha ḓo wanala vha tshi khou pfulusa kholomo lu si ho mulayoni kana vha si na thendelo (phemithi) ya u pfulusa ya vhulafhazwifuwo vha ḓo sengiswa.
Zwitshavha zwi humbelwa u vhiga avho vhane vha khou pfuka mulayo kana maitele a u pfulusa zwifuwo.
TSUMBADWADZE DZA VHULWADZE HA KHWANḒA NA MULOMO
- Biswa na zwilonda kha mulomo (marinini, meme dza mulomo na kha lulimi) zwi ita uri tshifuwo tshi konḓelwe u ḽa nahone zwi dovha zwa ita uri tshi dzulele u phophisa nthe.
- Biswa na zwilonda zwa vhukati ha khwanḓa na hune makwanḓa a ṱumana hone na lukanda, zwi nga ita uri tshifuwo tshi ṱudze nahone tshi si ṱoḓe u tshimbila-tshimbila. Tshiṅwe tshifhinga zwifuwo zwi fhedza zwi tshi xelelwa nga khwanḓa kana ṋala dzazwo.
- Kholomo dzi nga bva zwilonda kha ṱhungu dzadzo. Izwi zwi vhanga uri mveledzo ya mafhi i mbo ḓi tsela fhasi nga u ṱavhanya.
Sa Muhasho u re na vhaḓivhi vha vhulafhazwifuwo, ro zwi kona u langa vhulwadze nahone ri kha ḓi bvela phanḓa na u thivhela vhulwadze nga u ṱhavhela na nga ndaulo ya u pfuluswa ha zwifuwo.
Ndivhuwo
Ri tama u livhuwa vhafuwi na zwitshavha zwoṱhe zwine zwa khou shumisana na u tikedzana kha u lwa na u phaḓalala ha Vhulwadze ha Khwanḓa na Mulomo.
U itela vhuṅwe vhuṱanzi, vha humbelwa u dalela ofisi dzashu dzi re tsini navho kana vha foinele Vhaofisiri vha Vhulafhazwifuwo kha Zwiṱiriki zwi tevhelaho;
- Tshiṱiriki tsha Vhembe – 066 079 4597 Dr Tambudzani Rhangani
- Tshiṱiriki tsha Mopani – 072 553 0122 Dr KB Mohlabe / 066 079 4201 Dr Vonani Mashau
- Tshiṱiriki tsha Sekhukhune – 082 681 7259 Dr Charmaine Ṋemuloḓi
- Tshiṱiriki tsha Capricorn – 060 978 2317 Dr Nthabiseng Mashigo
- Tshiṱiriki tsha Waterberg – 082 936 2121 Dr Kgabo Letsoalo
